Monday, May 16, 2011

Senin Siang di Ruang Makan


Meja 5, barisan kiri.
“Jadi jua kah Kamis ni bulik bulanan?”
“Iyakah? Jar siapa ikam Mat?”
“Jar buhannya pang…”
“O iih, ada ai Ustadz Ahmad sumalam bapadah di kelas kami.”
“Kenapa jar? Maka baluman awal bulan?”
“Kamis kainanya lagi Presiden handak datang ke pondok jar…”
“Hah? Bujuran?”

Meja 9, barisan kanan.
“Bahutang aku Ham lah, baluman datang ja lagi kiriman nah…”
“Kam jua sakali datang kiriman bahambur duit banar.”
“Kayapa pang lagi, handak jua aku kaya urang. Kada kawa saban hari, pas datang kiriman barang. He…”
“Beh, mauk kam tu!”
“Si nah, bahutang aku lah…”
Meja 4, barisan tengah.
“Kenapa basah baju ikam Din?”
“Tatumpah tadi kuahnya pas barabut maambil iwak.”
“Makanya, mun maambil iwak tu bakawanan!”
“Buhan ikam pang tadi badahulu, kada mahadangi aku!”
“Ikam saurang jua balalambat, tahu ja hari Senin ni iwaknya ayam, nyata ai barabut.”
Meja 16, barisan tengah.
“Akayah…! Padasnya!”
“Hahaha… Ngarannya lombok, nyata ai padas!”
“Kada tahu aku tadi dibuati nini dapur lomboknya.”
“Hahaha…”
“Siapa mambawa banyu nih? Hwah… Padas banar nah.”
“Nang kaya kakanakan santri baru ha lagi mambawa banyu ka ruang makan! Hahaha.”
“Aduh… Kayapa nih…?”
Meja 7, barisan kiri.
“Piring siapa itu Min?”
“Ampun ka Ehsan.”
“Bah, pangulir lalu sidin ni bajalan ka ruang makan!”
“Kaitu ai sudah buhan tiga aliyah ni, hehe..”
“Iya am, mentang-mentang jadi ketua asrama, anak buah disuruh!”
“Santai ja muhanya, kita gin kaitu jua kaina mun sudah jadi ketua asrama, haha..”
Meja 13, barisan kanan.
“Malam ini buhan asrama kita undangan.”
“Hah, iyakah? Bujur-bujur…”
“Bujuran! Gasan apa aku bakaramput?”
“Jar siapa ikam?”
“Ustadz Bakri tadi madahi aku.”
“Wah, sip sip sip… Makan nyaman pulang kita malam ini, he…”
“Makan tarus dipikaran!”
Meja 2, barisan kanan.
“Napa Ding dikitannya makan?”
“Kanyang ja sudah parut.”
“Bakas makan apa?”
“Istirahat tadi mama ulun bailang mambawaakan nasi bungkus.”
“Oh… Gasan kaka ai mun kaitu iwaknya nah, hihihi..”
“Kanyamanan!”
Meja 11, barisan kiri.
“Dimamai satpam Kliwon aku tadi!”
“Hahaha…”
“Apa jarnya?”
“Rancak banar kaluar pondok kam ni, jarnya.”
“Tiwas, aur kaluar tarus!”
“Habis tu pang apa jarnya?”
“Bulik bulanan ini kam kada bulih bulik lagi, jarnya.”
“Terus?”
“Mau pang kaitu Man ai, jar ku.”

***

Meja 5, barisan kiri.
“Kada tahu-am lagi. Jar Ustadz Ahmad tu masih rencana jua pang.”
“Oh… Dalam rangka apa jar Presiden ka sini?”
“Nah, mun itu maginnya ai aku kada tahu. Ikam ada lo mambaca di koran Presiden handak datang mahadiri pembukaan STQ tingkat nasional di Banjar? Na, jadi bisa salajur itu pang kalu.”
“Oh… Kunjungan ka pasantrin ni lih kisahnya, sakira alim jua kalihatannya, hehe…”
“Mauk jua ai kaina tu buhan Ustadz manyiapakan Mat ai. Tapi bagus ja pang, sualnya mun Presiden datang tu pasti ada jua maninggali duit, malaran…”
“Bah, palingan saapa ada! Tatapai jua infaq kita kada turun, haha…”
Meja 9, barisan kanan.
“Gasan apa garang kam tu duit? Di sini kita biar kada baduitan tajamin ja makan talu kali sahari.”
“Tatap ai jua baisukan tapaksa nukar iwak di kantin…”
“Kada usah, di dapur ada ja iwak karing, hehe…”
“Ma ai, purunnya pang dirimu Ham…”
“Hahaha…”
“Lah, bahutang aku lah?”
“Eeh… eeh…”
“He…”
Meja 4, barisan tengah.
“Mencari baju dulu aku tadi.”
“Pabila ikam bisi baju?”
“Masin!”
“Haha… Yang kam pakai tu pang baju siapa?”
“Mauk!”
“Rasanya suah pang nah aku malihat, haha…”
“Mauk!”
“Di gantungan bajuku rasanya…”
“Mauk! Mauk! Mauk! Kada ku bulikakan tahi rasa!”
“Haha… Tu seminggu sudah kada kutapas Din ai. Pas ai ikam yang napasakan, rigat tu yati kana kuah bakas ikam. Haha…”
“Indah! Biar ikam paksa gin aku indah!”
“Haha…”
Meja 16, barisan tengah.
“Cari sana banyu, buhan malik dua biasanya mambawa seteng.”
“Iih lah, di mana yu buhannya duduk?”
“Tu na, di muka, parak lawang.”
Meja 7, barisan kiri.
“Bujur jua pang lah, kita gin bisa kaina kaitu jua pas sudah jadi ketua asrama.”
“Mun sawat. Bursia tuntung kelas tiga tsanawiyah ampih kayapa?”
“Mudahan ai sawat. Tuhuk sudah bajuang hidup di sini, rugi banar mun kada manuntung.”
“Sip tu! Ada aku ni kada tahu lagi nah, pinanya kaya handak ampih pang…”
“Hah? Kenapa?”
“Kada kakaruan jua aku sakulah di sini, baik ampih ja, pindah ka kampung.”
“Menyesal ikam kaina… Cubaakan ja!”
Meja 13, barisan kanan.
“Nangkaya ikam kada ha lagi!”
“Nang nyata kada kaya ikam, haha…”
“Bujuran lah…? He…”
“Eee… Sini ayamku, handak ikam apaakan?”
“Jarnya tadi kada mikirakan makan? Haha…”
“Kadanya kaitu pang… Mun sudah rajaki tu…”
“Bla bla bla… Haha...”
Meja 2, barisan kanan.
“Pian sudah kanyang jua lo, gasan kaka ai ayamnya, hehe…”
“Indah! Ulun handak mangipung.”
Meja 11, barisan kiri.
“Tasarah Ustadz ai Man ai, mun sidin maijini bulik ulun, mau pang pian manangati, jarku.”
“Apa jarnya habis tu?”
“Mauk ikam ni, banyak pandir, jarnya. Imbahitu diperiksainya tutukaranku, untung roko tadi kumasukakan dalam bungkusan nasi, jaka tida iya am.”
“Mun dipicik Kliwon bungkusan nasinya tu katahuan jua ai.”
“Iih, untung kada, hahaha…”

***

Meja 5, barisan kiri.
“Mun aku terus terang ja kada katuju pang bulik bulanan ni dilajui, soalnya pas bulan tuha. Bisa kada kawa manyangui kuitanku ni…”
“Alah, kada papa jua. Yang penting kita kawa tatamu Presiden, pabila lagi kawa? Iya kada?”
“Bujur pang. Tapi am, mun kada baduit ni tatapai ngalih dikisah.”
“Masuk tipi pulang, iya kalo Mat? Haha…”
Meja 9, barisan kanan.
“Pabila ikam mambayarinya?”
“Ma ai, baluman bahutang, ditagih sudah…”
“Kadanya kaitu pang, kaina ni aku tapakai jua, mun ikam lambat bayarnya kayapa?”
“Ayuha tenang ja, paling lawas saminggu lagi datang ai kiriman.”
“Bujuran lah, paling lawas saminggu?”
“Iih… iih…”
Meja 4, barisan tengah.
"Tahu ai sudah aku buhan kam ni sugih-sugih pang, banyak baisian baju, kada nangkaya aku pang..."
"Jangan menangis.... Haha..."
"Siapa jua yang menangis?"
"Na lo meraju..."
"Mauk!"
Meja 16, barisan tengah.
"Ah... nyaman sadikit muntung..."
"Makanya, makan tu balilihat, jangan balajur suap haja! Haha..."
"Maklumi pang, aku baisukan tadi kada makan lo... Aduh, padasnya! Siapa lagi nih mambuati?!"
"Hahaha..."
"?"
"Lain aku Tuh ai, tu na takuni Ihin."
"Lain aku jua Tuh ai, takuni Halis tu na..."
"Aku lain jua, tadi aku makan ja, kada manggaduhi buhan ikam."
Meja 7, barisan kiri.
"Insyaallah kada. Daripada aku di sini pina kakaruan, baik sakulah di lain ja, kalu pina babaik."
"Yakin garang ikam mun sakulah di luar babaik?"
"Ya, paling kada kan ada perubahan..."
"Tambah kada kakaruan! Baik tuntungakan ja di sini sakulah..."
"Muyak sudah aku di sini, turun gin pina kulir sudah aku wayahini."
Meja 13, barisan kanan.
"Sudah, sama ja barataan aur makanan ja dipikirakan."
"Jadi kaingatan semalam, pisang mantah ja barabut banar buhannya. Pas saigutan lalu ai mambuang, haha..."
"Untung aku kada dapat, haha..."
"Bah, umpatan jua ai tapinya barabut semalam."
"Di sini ni, nang sugih kah, nang kada kah, sama! Mun ada makanan barabut!"
Meja 2, barisan kanan.
"Mambantas tarus jua pian ni ding lah... He..."
"Mauk, bapandir tarus, mangganggu ulun makan ja pian ni."
"Ma ai... Kaitu ja sarik lah...?"
"Badiam jurang!!!"
"..."
Meja 11, barisan kiri.
"Mun panakutan jua tu paraya, baik kada usah pina kisah mambawa roko."
"Nyata ai aku takutan mun katahuan satpam. Kam nyaman kada suah masuk buku pelanggaran. Aku rancak sudah, sekali lagi diampihi..."
"Minta aku rokonya lah? Hehe..."
"Tukari! Kanyamanan minta!" []

13 comments:

  1. Ahahahahaaaaaa......
    Aku suka percakapan di Meja 2, barisan kanan.....
    Nyaman mangipung, sorangan,,,,,,,kakanya pamintaan.....hhahaha

    ReplyDelete
  2. Bukan hanya soal mangipung, ada "sesuatu" sbenarnya di balik itu. Efek lucu di dalamnya cuma bisa dimengerti oleh santri, hehe. .

    ReplyDelete
  3. Ho ho ho :D Meja 2, barisan kanan lucu!

    ReplyDelete
  4. Hehe. . Makasih makasih. . . .

    ReplyDelete
  5. Santri banar ksah'a tue....
    jd k'ingatan pas msh dpndok dlu...

    ReplyDelete
  6. hoho... mantan santri jua kah?

    ReplyDelete
  7. Darul Istiqamah... masa kda tahu,,

    ReplyDelete
  8. SARANACASH ADALAH SITUS ONLINE AGEN BOLA, CASINO ONLINE TERBAIK DAN TERPERCAYA DI

    INDONESIA.
    PERMAINAN SARANACASH DAPAT DIAKSES MELALUI HP ANDROID, HP IOS, LAPTOP, DAN PC.

    MINIMAL DEPOSIT HANYA RP.10.000,- DAN MINIMAL WITHDRAW RP. 20.000,-

    DALAM SATU ID DAPAT BERMAIN :
    - POKER - QIU - QIU - CAPSA SUSUN - SUPER TEN
    - TARUHAN BOLA/SPORTBOOK (SBO & UBOBBET)
    - LIVE CASINO/BACCARAT - ROULETTE
    - IDNLIVE
    - DAN SLOT GAME TERLENGKAP

    PROMO YANG DISEDIAKAN :
    - BONUS NEW MEMBER 20%
    - BONUS DEPOSIT HARIAN 5%
    - CASHBACK SPORTBOOK 8%
    - BONUS ROLLINGAN CASINO 0.8 %
    - BONUS TURNOVER POKER 0.5 %
    - BONUS REFERRAL ( minimal 3 player )

    BANK YANG TERSEDIA :
    -BCA
    -BRI
    -BNI
    -MANDIRI
    -CIMB

    UNTUK INFO LEBIH LANJUT DAPAT KUNJUNGI DI LINK
    WWW.SARANACASH.COM

    LINK ALTERNATIF :
    - www.saranacash.net
    - www.saranacash.org
    - www.saranacash88.com

    KONTAK KAMI :
    - WA : 0853 5288 0692
    - FACEBOOK : SARANACASH
    - Line :saranacashdotcom
    - INSTAGRAM : SARANACASH88


    bola88
    agen bola
    bandar bola
    judi bola
    agen bola terpercaya
    bandar bola online terpercaya
    judi bola online terpercaya
    agen poker
    satu game untuk semua permainan
    sportbook SBOBET
    bandar casino terpercaya
    judi casino terbesar
    agen poker terbaik
    bandar judi bola online terbaik
    bandar judi terbaik di indonesia
    daftar poker online
    freechip
    chip gratis
    poker indonesia
    bandar bola terbesar

    ReplyDelete