Tuesday, February 8, 2011

Mandiangin, 3 Tahun Kayuh Baimbai



Na… kaini kesahnya uhannya ai. Hari Ahad sumalam tu unda lawan kakawanan Kayuh Baimbai (blogger banua) tulakan ka Mandiangin, dalam rangka ulang tahun Kayuh Baimbai nang katiga. Bakumpulnya pamulaan di Taman Air Mancur Banjarbaru. Di undangan jam 8, jadi jam setengah 8 tulak sudah unda matan Handil Bakti. Sampai ka sana jam satangah 9, harau, kadadaan lagi urangnya. Unda ja sakalinya nang datang sungsung, maka panjauhnya.

Jadi daripada muyak mahadangi, umpatan nangkaya urang ai jua kuliling Murjani, kesah lari pagi jua nih. Barapa putaran kah (manggah sudah), lalu tatamu Heri, bubuhan Kayuh Baimbai jua (sidin ni jadi tapaimbai lawan unda). Ka Taman Air Mancur ai kami. Na, di sana ada sudah sakalinya si ketua (seumur hidup)-nya, amang Harie, lawan amang Saprie. Dudukanai dulu kami mahadangi bubuhan nang lain.

Jam barapa kah, kada tapi ingat lagi, hanyar pina banyak urangnya. Rancana pamulaan handak baelang (balilihat) ka kantur kuran Radar Banjarmasin, lawan kuran Media Kalimantan. I… sakalinya kada jadi. Marganya, Radar Banjarmasin hari damintu baulang tahun (baganti logo jua), acaranya iya di lapangan Murjani tu tih, buhan kami diundangnya, jadinya kada jadi ai kami bajajanak ka kanturnya. Ada Media Kalimantan, sakalinya kantur produksinya nang di Banjarbaru tu kadadaan urangnya jar, disana malam bagawinya (ngarannya haja kuran). Buhan Media Kalimantannya manyuruh ka kanturnya nang di Banjarmasin haja, tagal maapa jua ka sana mun kada kawa malihat urang manggawinya.




Laluai kami pas sudah pina banyak takumpul tu tulakan ka Lapangan Murjani. Parak haja, jadi bajalan gin sampai. Satumat haja jua di sana, daripada mahadiri undangan haja. Napa disurungi makanan kadada jua, baapa balawas-lawas, haha… Tuntung itu, hanyar buhan “tutuha”-nya manyiapakan napa-napa nang cagar dibawa ka Mandiangin, handak manggang iwak kalu kesahnya.

Kira-kira pas zuhur, hanyar kami tulakan baimbai ka Mandiangin. Banyak sudah urangnya itu tu, 20-an labih. Sukur harinya kada hujan, jadi kawa haja sampai kadada halangan napa-napa. Palingan “anu” unda nang kada tahan lagi handak bakamih. Jauh jua ih sakalinya ka Mandiangin tu tih, maka kami santai haja pulang, jadi lawas hanyar sampai. Jalannya naik-turun naik-turun, kada tapi mulus ha pulang.


Tapi kada sia-sia jua pang pas sudah sampai ka sana. Bah, air terjunnya bagus lalu. Hanyar ini nah unda ka sana. Hanyar sakali itu rasanya malihat air terjun, makanya bagus banar jar unda, hihihi… Nangaran hari Ahad, jadi banyak jua urangnya di sana. Gadisnya sing banyakan, tapi ada lakiannya sudah L. Asing-asingnya mojok, baragap-ragapan, nangkaya apa kah. Jadi bahiri unda (maklum, kada tapi payu). Hutan pang disana tu, jadi pas banar mun gasan pacaran. Telkomsel kada basinyal disana tu dikaramputinya menjangkau seluruh kecamatan, tapi biar basinyal kada kawa maapa-apa jua pang, napa pulsanya kadada jua, he…


Sambil mahadangi iwaknya masak, bapapandiran satumat kami. Na, banyak parubahan sakalinya di ulang tahunnya nang katiga ngini. Mun kada salah ingat, ini-ini nah:

- Kopdar (kopi darat / pertemuan) tiap 3 bulan ja lagi, ampih tiap bulan (sakira dandaman kaitu nah). Tapi kopdarnya tu salajur wisata, nangkaya ka Mandiangin tu tih.
- Duit ampih baiuran nangkaya rajin, kayapa pang dananya? Na, jadi pas tiap kali handak wisata (bajalanan) tu haja hanyar bakumpulan. Kayapa? Akur? He..
- Tiga bulan imbah ini rancananya kopdarnya ka Angsana, banyalam balilihat terumbu karang. Snokerling kah istilahnya, kada tapi bisa jua nah manyambat.
- Na, ini nang penting. Mulai wayahini peraturan baganti, kada lagi nangkaya dahulu asal sakali umpat kopdar sudah. Wayahini harus umpat tarus, mun 3 kali kada umpat langsung dicoret. Agak kejam pang, tapi baik kaitu, biar ja anggotanya sedikit tapi rakat, lawan aktif barataan. Jadi anggota-anggotanya tu diasai, mana nang kada aktifnya dihapusi. Kaitu jua agregatornya, diasai jua. Beh, untung unda hadir hari itu, jadinya masih tacatat sebagai anggota. Wkwkwk…
- Admin (tukang udak website)-nya baganti jua wayahini. Mun kada salah: Carbone, Said, lawan Andri.

- Anggota nang lain admin kawa jua wayahini umpatan mosting di website kayuhbaimbai.org. Tapi anggota nang aktif haja jua pang, lawan disetujui jua dulu postingannya, hanyar diterbitkan adminnya. Sakira kada mosting nang kada kakaruan kaitu nah. Kalu ai kan postingannya kaini haja: “Bingung ah, mau mosting apa. Apa ya…?”

Tapi tetap ja pang postingan nang penting diandak di atas, postingan bubuhan anggota tu diulahakan menunya baasa haja.

- Siapa nang handak nukar buku “Menulis Dalam Gelap”, lajui. Masih banyak bukunya. Harganya 20 ribu, mun lain anggota harganya salawi ribu.

Nah, itu ja nang unda ingat rasanya. Habis bapandiran tu niup lilin angka 3 ai lagi. Tukang baca doanya amang Sapri.

Habis tu hanyar acara intinya: MAKANAN!!! nang sing panjangan tadi tu pembukanya haja, hehe

Sudah kanyang tu kujuk-kujuk ai lagi, balilihat urang pacaran, malihat barang. Haha… Handak mandi unda, tapi tilasan kada mambawa. Jaka mambawa mandi tu pang jua kaya buhannya….


Na, kaitu ja kisahnya buhannya ai. Habis tu bulikan ai lagi, urang pina sunyian jua sudah. Di jalan kahujanan, bamandakan satumat. Di Landasan Ulin (nang banyak urang singgah sambil malihat pasawat tu nah, tahu ai kalo), tatinggal bubuhan nang matan Banjarmasin ja lagi. Singgahan kami makan mie ayam, ditraktir amang Rizal Kesah Islami, gajihan kalu sidin ni putungan, haha….

SEKIAN


________________________________

Tulisan sederhana ini didedikasikan untuk Komunitas Blogger Kayuh Baimbai dan semua anggotanya. Selamat ulang tahun, semoga terus menjadi lebih baik.

23 comments:

  1. wah, pingin dong ikan bakarnya ...

    ReplyDelete
  2. Siap² gasan 3 bulan kena lah .. nyaman kita tulakan pulang ..

    :) acara hut kkb sumalam nang paling sederhana namun paling mambari kesan, he he

    ReplyDelete
  3. asik kita tulakan pulang ,,,,hehehehe...rugi kada banyalam, ckckckckckckk....

    ReplyDelete
  4. Andrie : dirimu kan fotografernya smlm .. jd kdd fotonya .. xixixixixixi, kalau mau, minta sama Hersan .. :ngakak:

    ReplyDelete
  5. Haw. .haw. .haww. .kerenn..!!hha

    - Aku suah ke Mandiangin,tp blm mlhat waterfallnya... Jd iri wn kam. .haha
    - Menyelam di sea, ,mlht terumbu karang... Wow! I want. . .gkgk*nyambung kd lh*
    - Menulis dlm Gelap...siapa yg m'ulahnya (penulisnya)..?!he

    ReplyDelete
  6. sudah habis. kekekekkkk

    ReplyDelete
  7. mudahan kadada halangan. he...
    wah, mun bagi ulun yg paling berkesan tu yg pertama, soalnya dpt HP, hehehe...

    ReplyDelete
  8. nyataai rugi..... banyalam tu juatujuannya, hahaha

    ReplyDelete
  9. pasang sorang, haha!

    ReplyDelete
  10. - Hah? kemananya km tu, lain mandiangin bisa, haha.... (padahal dirimu orang martapura)
    - makanya, jadi anggota Kayuh Baimbai, nyaman kawa umpatan, dari dulu sdh aku membawai.
    - Tu buku kumpulan postingan bubuhan Kayuh Baimbai (tapi aku kada umpatan). Nukar kah? Murah...

    ReplyDelete
  11. aturan harus umpat kopdar tarus nitu bilang talalu banar lih, handak bakajal di komunitas haja sing ngalihan aturannya, beh

    ReplyDelete
  12. kada harus umpat tarus, tapi yang penting tu kada sampai 3 kali kada hadir berturut-turut. :)

    ReplyDelete
  13. -Mandiangin jua ai..tapi........
    -Handak banar umpat mun banyak wisatanya kytu,tapi......
    -Ya kah..keren pasti isinya...tapi di mana nukarnya?

    Hahaha....

    ReplyDelete
  14. @ Barang aja:
    Tapi kenapa?
    Nukarnya kawa mesan lawanku, haha...

    ReplyDelete
  15. hanyar aja auk telihat ada jua sekalinya nampang wkwkwk

    ReplyDelete
  16. nyata ja ah, awak pengganalnya...

    ReplyDelete
  17. Hahahahaha
    disambatnya am! padahal fotonya pina bagus kada tapi kelihatan ganalnya. wkwkwk

    ReplyDelete
  18. Haha. . . Km ai sdh pmbungasx. Gkgk. .

    ReplyDelete
  19. kada tahu hbar lagi unda nah,ngalih jua urang kampung mamusting,pina iya bnar bhasanya,bhasa bbuhan darat,haha
    napa situs kyuh baimbai kd kw di acces lg tuh
    q hdak nukar am bukux,,dimanang ada bajual?

    ReplyDelete
  20. iih, bahsa buhan darat. haha...
    situsnya lagi dibaiki jar mas harie, handak diganti tampilannya.
    nukar buku datangi ka rumah mas Harie.

    ReplyDelete
  21. Tulisannya mantaaaaaaappp,,

    sampai habis aku ,mambaca:)

    ReplyDelete
  22. Ganal gulu baju jadinya nah :D

    ReplyDelete